Аԥсны Жәлар рышәҟәыҩҩы Алықьса Гогәуа иира амш аламҭалаз Sputnik апресс-центр аҿы имҩаԥысит авидеоцҳа Аҟәа – Москва "Алықьса Гогәуа илитературатә ҭынха".
Уи иалахәын ашәҟәыҩҩы, аиҭагаҩ Денис Чачхалиа, Дырмит Гәлиа иҩны-музеи аиҳабы Светлана Қорсаиаԥҳа, апублицист Даур Наҷҟьебиа, алитератураҭҵааҩы Виачеслав Бигәаа.
Дара иазгәарҭеит Гогәуа аԥсуа литература иналукааша ахаҭарнакцәа дызларуаӡәку ала илитературатә ҭынха аиқәырхареи аларҵәареи аҵак ду шамоу.
Д. Гәлиа иҩны-амузеи аҿы ицо аиҭашьақәыргылара далацәажәо Светлана Қорсаиаԥҳа инаҵшьны иазгәалҭеит, ирҿыцу ахыбраҿы иаԥсоу аҭыԥ шааннакыло Алықьса Гогәуа ирҿиара.
Ашәҟәыҩҩы Даур Наҷҟьебиа автор иҩымҭақәа зегьы реиҭаҭыжьра хымԥадатәиуп ҳәа иԥхьаӡоит.
Алықьс Гогәуа — Аԥсны Жәлар рышәҟәыҩҩы, Д. Гәлиа ихьӡ зху Аҳәынҭқарратә премиа алауреат, Жәларбжьаратәи Адыгатәи аҭҵаарадыррақәа ракадемиа ҳаҭыр зқәу академик, Аԥсны Зҽаԥсазтәыз акультура аусзуҩы, "Ахьӡ-аԥша" аорден I аҩаӡара занашьоу, Аԥсны жәлар рфорум "Аидгылара" раԥхьатәи ахантәаҩы.
Гогәуа дравторуп 10 инареиҳаны апрозатә шәҟәқәеи, ҩ-пиесаки, акритикатәи апублицистикатәи статиақәеи аочеркқәеи. Ироман-рапсодиа "Асду" Аԥсны акульт ҟазшьа змоу ҩымҭахеит.
Иҩымҭақәа еиҭагоуп аурыс, англыз, анемец, афранцыз, аиспан, авенгр, аполиак, аболгар бызшәақәа рахь.
Гогәуа ихаҭа аԥсшәахь еиҭеигеит Лев Толстои, Фиодор Достоевски, Андреи Платонов рырҿиамҭақәа.
Иԥсҭазаара далҵит 2025 шықәса лаҵара 7 рзы.