Аспектакль "Акәукәу аҭра ахыԥраара" аҵыхәтәантәи аҽазыҟаҵарақәеи уи иацу агәыхыҭхыҭреи ртәы арадио Sputnik аефир аҿы иазааҭгылеит аспектакль аҟны ароль хада назыгӡо, Шьепкин ихьӡ зху иреиҳаӡоу атеатртә ҵараиурҭа астудент Лана Лашәриаԥҳаи атеатр асахьаҭыхҩы-ақәыргылаҩ Витали Қацәбеи.
Утәыла, уҭаацәа, уҩызцәа рҿаԥхьа ақәгылара еиҳа иуадаҩуп атәым ҳәынҭқарраҿ ақәгылара аасҭа. Сгәы хыҭхыҭуеит. Иҟоуп маҷк ашәарагьы, аха уи зегь сашьцылап ҳәа сгәы иаанагоит ҳәа лҳәеит Лашәриаԥҳа.
Асахьаҭыхҩы Витали Қацәба иажәақәа рыла, аспектакль иацу ауадаҩрақәа ыҟазаргьы, ахәаԥшцәа рыдгалара хымпада иаԥсоуп. Аԥышәа ду змоу актиорцәеи ақәыԥшцәеи қәыргыламҭак аҿы реилаӡҩара цоит асценаҿ. Сгәанала азнеишьа акырӡа ииашоуп. Ахшыҩцқьа змоу ақәыԥшцәа ҳзааит. Уи уаргәырӷьоит , иҳәеит иара.
Шәахәаԥш инеиҵыху авидеонҵамҭа.