"Наџьнатә аахыс, ақәаҭана скыртә сҟалеижьҭеи ацәқәа рыла сцәаӷәоит, ақәаҭана иацәаӷәои атрактор иацәаӷәои узеидкылаӡом. Қәаҭанала сара изысҭаху еивҵаԥсаны исцәаӷәоит, инысҭаху адгьыл стыхоит, аџьықәреи ласҵоит", — ҳәа иҳәоит Анзор Аиба.
Атракторлеи ақәаҭаналеи иуцәаӷәо адгьыл еиԥшӡам. Аџьықәреи ахаҭабзиареи аҽаҩреи анырра анаҭоит атракторла ианыцәаӷәо, адгьыл атрактор ианацәаӷәо абзиара зегьы аҵаҟа иагоит хыхьҟа ацәгьара ханагалоит, иара уаауп аџьықәреи аԥашәгьы ахьакуа, убри аҟынтә қәаҭанала иуцәаӷәази илауҵази ауп ибзиоу.
Иахьа ацәқәа рыла ицәаӷәо рхыԥхьаӡара маҷзаргьы Гәдоуҭа араион иахьаҵанакуа Џьырхәеи, Бармышьи, Ҟәланырхәеи, Абгархықәи реиԥш иҟоу ақыҭақәа рҿы адгьыл ахьиашам, атехника неиртә еиԥш иахьыҟам анкьа еиԥш ицәаӷәоит.
Ацәаӷәара иазку аҭоурых инарҭбааны шәаԥхьар ҟалоит абра
Ацәаӷәара авидеонҵамҭа шәахәаԥшыр ҟалоит абра
