АҞӘА, хәажәкыра 30— Sputnik, Амра Амҷԥҳа. Аԥснынтәи анцәа дхазҵо аныҟәаҩцәа Иерусалимҟа амҩа иқәлоит Амшаԥ аламҭалазы амца ԥшьа аҟәырҷаха ааргаразы. Абри атәы ҳкорреспондент изеиҭеиҳәеит Аԥшьа Симон Канатәи Аԥшьа Евстафи Аԥсилтәии рыхьӡ зху афонд ахантәаҩы ихаҭыԥуаҩ Леван Адлеиба.
"Ҵыԥх еиԥш сынтәагьы, Анцәа ду имчала Амца ԥшьа аҟәырҷаха Аԥсныҟа иаагараны ҳаҟоуп. Ҳара ҳарҭаараны ҳаҟоуп Иерусалим, Адгьыл ԥшьа руахәамақәа, Вифлием, Назарет, Палестина. Анцәа ицхыраарала Асабша ду азы Амца ԥшьа агылара анашана ашьҭахь иара аҟәырҷаха ҳаманы Аԥсныҟа ҳажәлар ирзаҳшарц ҳхынҳәуеит", — ҳәа еиҭеиҳәоит Адлеиба.
Аԥсуа Иашахаҵаратә уахәама аиҳабы аиереи Виссарион аныҟәаҩцәа рымҩа иԥшьоит. Аб Виссарион ари аныҟәара Аԥсназы иныҳәа дууп ҳәа ишьоит.
Амҩа иқәло рзы анцәаимҵаныҳәара мҩаԥыргон Илиа иуахәама амҵаныҳәаҩ аиреи Далмаҭи (Гоԥиа) аиереи Никитеи (Адлеиба). Даргьы ҵыԥх еиԥш сынтәагьы Аԥснытәи аныҟәаҩцәа хадара рырҭоит. Аиереи Далмаҭ иҳәоит дарбанызаалак анцәа дхазҵо изы Иерусалим анеира насыԥуп ҳәа.
"Анцәа иҭаххарада акгьы ҟалашьа амаӡам. Ҵыԥх Иерусалим анеира ҳқәашьхеит. Сынтәагьы Анцәа даҳхылаԥшып уи аус ԥшьа аҟны. Анцәа дырхылаԥшааит ҳажәлар зегьы. Ҳажәеи ҳуси акызааит. Аилибакаара ҳауааит", — иҳәоит Аиереи Далмаҭ.
Иерусалим Амца ԥшьа агылараан иузцәырҵуа ацәаныррақәа жәала рҳәара уадаҩуп лҳәоит Манана Кокосқьырԥҳа. Лара ԥшьынтәуп Иерусалимҟа абри аамҭазы аԥснытәиқәа дрыланы дцоижьҭеи. Амца ԥшьа анҩеилак ашьҭахь аныҟәаҩцәа Амшаԥ аламҭалазы Амца ԥшьа аҟәырҷаха рыманы Аԥсныҟа ихынҳәуеит.
Ҵыԥх еиԥш сынтәагьы Иерусалимҟа ацара еиҿнакааит Аԥшьа Симон Кананити Аԥшьа Евстафи Аԥсилтәии рыхьӡ зху афонд. Афинанстә цхыраара руеит ареспубликатә уаажәларратә еиҿкаара "Аԥсадгьыли" ҷыдала амеценат Беслан Ешбеи рҟынтә.