"Аҳаирплан ашьыжь Гаванантә иԥрит, ҩ-сааҭк, х-сааҭк рыла иара тәеит Манагуа. Аҳаиртә баӷәаза аҟны аҳәынҭқарратә визит иаҵанакуа атрибутика зегьы ыҟан – ауарҳал ҟаԥшь, аҳаҭәыртә ҟарул. Аиҳабыра ахьӡала Сергеи Багаԥшь иԥылеит Никарагуатәи адәныҟатәи аусқәа рминистр, анаҩс инагӡан аҳәынҭқарратә гимн. Уи ашьҭахь ҳамҩа хан аҳҭнықьалақь ахь. Никарагуа ашҭа ду аҿы еиҿкаан аныҳәа, уи далахәын аҳәынқарра ахада Даниель Ортега.
Аҩ-ҳәынқаррак рхадацәа Сергеи Багаԥшьи Даниель Ортегеи русеицуразыи реиҩызаразыи аиқәшаҳаҭра рнапы аҵарыҩҩит ишиашоу ицоз аефир ала. Уи анаҩс Ортега ахсаала аҟны днеины Никарагуатәи ахәаԥшцәа идирбон Аԥсныи Аахыҵ Уаԥстәылеи ахьыҟоу, ҭыԥс иаанныркыло", — иҳәеит Инаԥшьба.