АҞӘА, цәыббра 5 – Sputnik. Рауль Ҳаџьымба официалтә ныҟәарала Шьамтәылаҟа дцеит. Дамаск, Ажәлар Рхан аҿаԥхьа имҩаԥысит Аԥсны Аҳәынҭқарра Ахадеи Шьамтәылатәи Арабтә республика Ахадеи реиԥылара ацеремониа. Абри азы адырра ҟалҵеит Ахада ипресс-маӡаныҟәгаҩ Наала Аҩӡыԥҳа.
Аԥсны Ахада Рауль Ҳаџьымбеи Шьамтәылатәи Арабтә республика Ахада Башар Асади реиԥылараан ирылацәажәеит ҩ-ганктәи аусеицура азҵаарақәа иара убасгьы аԥсны-шьамтәылатәи аизыҟазаашьақәа рыҿиашьа.
Аԥснытәи аделегациа иалахәуп: Аԥыза-министр Геннади Гагәылиа, Ахада иусбарҭа анапхгаҩы Беслан Барцыц, Ашәарҭадаратә хеилак амаӡаныҟәгаҩ Муҳамед Кьылба, Адәныҟатәи аусқәа рминистр Даур Ақаҩба, Атәылахьчара аминистр Мераб Кьышьмариа, Аекономика аминистр Адгәыр Арӡынба.
Иазыԥхьагәаҭоуп Аԥсни Шьамтәылеи рыбжьара аиҩызареи аусеицуреи рзы Аиқәшаҳаҭра анапаҵаҩра.
Иара убасгьы напы рыҵаҩхоит аиҳабырабжьаратә еиқәшаҳаҭрақәа.