АҞӘА, цәыббра 11– Sputnik. Тирасполь, Аԥсны Аԥыза-министр Геннади Гагәылиа иԥсҭазаара дахьалҵыз инамаданы адышшыларатә шәҟәы хдыртит. Абри атәы ааицҳаит Приднестровиатәи Молдавиатәи ареспубликаҿы иҟоу Аԥсны Ахаҭарнак Александр Ватаман.
"Иахьа, Приднестровиатәи Молдавиатәи ареспубликаҿы иҟоу Аԥсны Ахаҭарнакра иаҭаауан Приднестровие аҳәынҭқарратә усзуҩцәа реиԥш ауаажәларра рхаҭарнакцәагьы. Урҭ хаҭала дрыздырамызт Геннади Леонид-иԥа, аха Аԥсны ахьаа дара рзгьы ихьаа духеит", — ҳәа аҳәоит Ахаҭарнакра адырраҭараҿы.
Ашәҟәаҿы агәалсратә ажәақәа ранҵаразы арахь имҩахыҵит Молдова иҟоу Урыстәыла Ацҳаражәҳәарҭа анашьҭҩы Романов Рома, Приднестровиатәи Молдавиатәи ареспубликаҿы иҟоу Аахыҵ Уаԥстәыла Ахаҭарнак Витали Ианковски, ақалақь Бендеры Жәлар реизара ахантәаҩы Иури Кара.
Геннади Гагәылиа машәырла иԥсҭазаара далҵит цәыббра 8 руха. Аԥсыжра ҟалоит цәыббра 12 рзы, Гәдоуҭа. Ареспубликаҿ алахьеиқәратә мшқәа рылаҳәоуп. Ахашаҽны абираҟқәа ларышьҭуеит.