АҞӘА, ԥхынҷкәын 11 – Sputnik, Бадри Есиава. "Росэнергоатом" Пицунда аа-метрак иҟоу аԥсаӡ ҳамҭас ианаҭеит ҳәа Sputnik акорреспондент изеиҭеиҳәеит Пицунда ахада ихаҭыԥуаҩ Алиас Аиба.
"Росэнергоатом" Пицунда ақалақь аа-метрак иҟоу аԥсаӡ архиагақәагьы ацҵаны ҳамҭас ианаҭеит. Ари аԥсаӡ уаанӡа иҳамаз аасҭа идууп. Ақалақь ахадара активла аҽазыҟаҵарақәа ирҿуп", — ҳәа еиҭеиҳәоит Аиба.
2019 шықәсазтәи аныҳәатә уснагӡатәқәа Пицунда имҩаԥгахоит ԥхынҷкәын 29 рзы. Ашықәс ҿыц аламҭалазы ауарӷантә музыка азал аҿы иқәгылоит аҭыԥантәи амузыкатә школ аколлектив, имҩаԥгахоит "Курорт Пицунда" аҿы агала-концерт.
"Росэнергоатом" акорпорациа "Росатом" иалахәуп, урыстәылатәи атомтә фымцастанциақәа ироператоруп. "Росэнергоатом" адиректор хада актәи ихаҭыԥуаҩыс дыҟоуп Аԥсны ииз Џьумбер Тҟьебучаа.
Урыстәылатәи аконцерн изныкым Аԥсны ацхыраара азнауеижьҭеи. Убас, 2017 шықәса рзы РУСДРАМ иазаанахәеит асценатә мыругақәа, аспектакль ҿыц ақәыргылараз аԥаразоужьра мҩаԥнагеит.