АҞӘА, ԥхынҷкәын 11 – Sputnik, Сариа Кәарцхьиаԥҳа. Афон ҿыц аҽазыҟаҵара иалагахьеит Ашықәс ҿыц аԥыларазы ҳәа Sputnik акорреспондент илзеиҭеиҳәеит Афон ҿыц ахадараҿ аҿари аспорти русхк азы аилак ахантәаҩы Михаил Цкәуа.
Аа-метрак инаӡо аԥсаӡ ықәдыргылоит афырхацәа рашҭаҿы.
"Сынтәа ҳаԥсаӡ ҳарԥшӡоит ажәҩангәыԥшшәылеи, аҟаԥшьи, ашкәакәеи аԥшшәқәа змоу агирлиандақәеи абантқәеи рыла", — иҳәоит Цкәуа.
Уи адагьы адәыӷбаангыларҭаҿгьы иқәыргылахоит аԥсаӡ маҷ. Ақалақь амҩаду хада лашарала ихыркхоит.
"Ақалақь ԥшӡахандаз ҳәа ҳҽазаҳшәоит, аныҳәатә ҭагылазаашьа аиурц ҳҭахуп. Афымцаркыгақәа рыла ирхиахоит Лакоба, Ладариа, Ешба рымҩадуқәа", — ҳәа еиҭеиҳәоит Афон ҿыц ахадараҿ аҿари аспорти русхк азы аилак ахантәаҩы Михаил Цкәуа.
Ашықәс ҿыц ақалақь аҿы азгәаҭара хацдыркхьеит ахәыҷбаҳчақәеи ашколқәеи рҿы.
Ашықәс ҿыц ауха ақалақь аҿы аныҳәатә концерт еиҿкаахом. Ԥхынҷкәын 31, асааҭ 12:00 рзы афеиерверк ҟалоит.
2019 шықәса ажьырныҳәа 7 рзы рзы Афон ҿыц ауааԥсыра анимациатә шоу дырбахоит Афырхацәа рашҭаҿы.
"Ҳара Ақьырсатә ԥсаӡ ҳҽазыҟаҳҵоит, афонаа рзы мацара адагьы аԥснаа зегьы рзгьы", — иҳәоит иара.
Анимациа иалахәхоит ахәыҷтәы театртә гәыԥ "Х-расацк". Алахәылацәа аҳамҭақәа рзыԥшуп.
