АҞӘА, ажьырныҳәа 21 – Sputnik, Бадраҟ Аҩӡба. Аинтеллектуалтә хәмаррақәа "Иарбан? Иаба? Ианба?" 2019 шықәсазтәи рсезон хацыркхоит Москва, жәабран 18 рзы ҳәа Sputnik иазеиҭеиҳәеит Москватәи аԥсуа диаспора анагӡаратә директор Даур Барганџьиа.
"Ахәмарра иалахәхоит акомандақәа жәба рҟынӡа. Аҳәара ҟаҳҵоит заанаҵы арзаҳалқәа аашәышьҭырц" - иҳәоит иара.
Аиҿкааҩцәа ишазыԥхьагәарҭо ала, ахәмаррақәа мҩаԥыслоит шықәсык ахь ԥшьынтә.
Ахәмаррақәа мҩаԥысуеит адиаспора рхаҭарнакцәа рзы аха Аԥснынтәи акомандақәагьы алахәхара рылшоит ҳәа азгәеиҭеит Барганџьиа.
Иара ишиҳәо ала аинтеллектуалтә хәмаррақәа "Иарбан? Иаба? Ианба?" Москватәи аԥсуа ҿар акыр ирылаҵәаны иҟоуп.
"Актәи ахәмарра инаркны ахьӡ-аԥша шьҭыҵит. Абри ашьҭахь ҳара иҳаӡбеит еиҳа лассы-лассы имҩаԥаагаларц. Ахәмаррақәа аҵак ду рыманы иҟоуп аҿар реибадырреи реинырреи рҿеиԥш ииашаны рыԥсшьараамҭақәа рыхгара аиҿкааразгьы" - иҳәеит иара.
Барганџьиа ишиҳәо ала азҵаарақәа рхырхарҭақәа еиуеиԥшым.
"Ҳара иара убасгьы иҳамоуп авидеозҵаарақәа. Егьырҭ атәылақәа рҿы инхо ҳдиаспора ахаҭарнакцәа ҳрыҳәоит рызҵаарақәа аарҭиларц" - иҳәоит иара.
Ахәмаррақәа рылахәразы арзаҳалқәа шрыдыркылои ахәмаррақәа ррегламенти ртәы аилкаара алшоит Москватәи аԥсуа диаспора асаит аҿы.