АҞӘА, жәабран 11 – Sputnik. Аҧнсы зҽаҧсазтәыз аҳәынҭқарратә жәлар рашәаҳәареи рыкәашареи ансамбль ахкынагӡаҩ, Аҧсны жәлар рартист Анри Ферзба 65 шықәса ихыҵит жәабран 11 рзы.
"Иахьа ашьыжь инаркны ауаа аҭел асра иалагеит, сҩызцәа. Аусура санааи схы-сгәы иҭамкәа уаанӡатәи ҳастудентцәа ашә аартны иааҩналеит, иҟалаз сзымдырӡеит. Иааиз ашәаҳәара акәашара иалагеит, уи даара сгәы иаахәеит, сколлегацәа зегьы исыдырныҳәалеит", - иҳәеит Ферзба.
Адныҳәаларақәа иацырҵеит иахьа Аҟәатәи Аҳәынҭқарратә акультуратә ҵараиурҭа астудентцәа.
"Аҳамҭа ухзыртәало аӡәгьы иуиҭаӡом, аха гәык-ԥсыкала сахьыргәалашәаз убри сара ҳамҭа дуӡӡоуп ҳәа сахәаԥшуеит", - ациҵеит иара.
Ауаҩы пату аниқәырҵо, иџьабаа ҳаҭырла ианазнеиуа, усҟан иара иқәрагьы уиаҟара иныԥшӡом, азгәеиҭеит Анри Ферзба.
"Зны-зынла санхәыцуа 65 шықәса схыҵҵәҟьама аасгәахәуеит. Сара схәыҷаахыс сҭаацәараҿы ашәаҳәара акәашара збон, анаҩс Аҳәынҭқарратә ансамбль аҿы аусура салагеит, абарҭ уқәра ухадыршҭуеит ҳәа сыҟоуп", - иҳәеит аиубилиар.
Анри Ферзба ашкол ахь дцаанӡагьы асценашҟа дцәырҵхьан, анаҩс иҩызцәагьы иаргьы ықәгылон Очамчыра, Аҟәа, Қарҭ, Москва.
"Апрофессионалтә сценаҿы 70-тәи ашықәс аахыижьҭеи сықәгылоит, уца рҳәаанӡа сыҟазаауеит, сыздыруам иахьынӡасылшо аха. Ансамбль "Шьараҭын" аҿы 25 шықәса скәашеит, аибашьра ашьҭахь саҟәыҵит акәашара, арҵаҩра сҽазыскит", - азгәеиҭеит иара.
Анри Ферзба ансамбль "Шьараҭын" аҟны акәашара даҟәыҵит, аха иахьа уажәраанӡа ашәаҳәара иациҵоит Аҳәынҭқарратә ансамбль аҿы. Аиубилиар иҭаацәараҿы зегьы аҟазара рнапы алакуп, ашәа рҳәоит, икәашоит, ихәмаруеит жәлар ринструментқәа рыла.