АҞӘА, жәабран 20– Sputnik, Бадри Есиава. Атәыла иахьаҵанакуа зегьы афымцалашара арцәара актәи амш аҽны ианаамҭаз зехьынџьара афымцалашара рыҭан Аҟәа ақалақь агәаҿы ада, астанциа маҷ "Сухум-1" аҿы иҟалаз авариа иахҟьаны. Абри атәы Sputnik иазаарыцҳаит АУН "Амшынеиқәафымцамч" апресс-маҵзураҟынтә.
Аилахәыра адыррақәа рыла, абригада аҭыԥ ахь инеит, аусурақәа мҩаԥысуеит.
ЕгрыГЕС зынӡа аусура аанкыламхарц азы Аԥсны иахьаҵанакуа жәабран 20 инаркны афымцалашара дырцәалоит ҳәа аанацҳаит "Амшынеиқәафымцамч" апресс-маҵзура.
Жәабран 19, 2019 шықәса рзы иҟоу азыԥхьагәаҭарала ЕгрыГЕС хәажәкыра-мшаԥы амзақәа рзы 310 миллион киловатт-сааҭ афымцамч арҿиара алшоит. Убри аан Аԥсны афымцамч ахархәара 366 миллион киловатт-сааҭ итәоит. Адефицит 56 миллион киловатт-сааҭ шьақәнаргылоит ҳәа аҩуеит аиҿкаара апресс-маҵзура.