АҞӘА, хәажәкыра 26 – Sputnik, Бадраҟ Аҩӡба. Аҟәатәи "Нарҭ" гәдоуҭатәи "Риҵа" иаԥнагеит ашьапылампыл азы Аԥсны ачемпионат ажәбатәи атур аҿы ҳәа адырра ҟаиҵеит "Нарҭ" ахьчаҩбжа, арадио Sputnik адырраҭара "Дополнительное время: мир футбола ConIFA" амҩаԥгаҩ Лаша Кәаӷәаниа.
"Аиԥылара актәи атаим абжара инеиуаны, "Нарҭ" ахәмарыҩ Анри Ҳагба акарточка ҟаԥшь иоуит. Абри ашьҭахь акоманда "Нарҭ" аҿы аҵыхәтәанынӡа жәаҩык ракәын ихәмаруаз", - иҳәеит иара.
"Нарҭ" хыԥхьаӡарала ишеиҵазгьы, аԥыжәара агеит 3:2 ҳәа.
Аҟәатәи "Нарҭ" атурниртә таблицаҿ актәи аҭыԥ шааннакылац иааннакылоит, 24 очко актив аҿы иаманы.
Ашьапылампыл азы Аԥсны ачемпионат иалахәуп акомандақәа: "Нарҭ", "Гагра", "Риҵа" "Афон", "Самырзаҟан", "Динамо" Аҟәа.