АҞӘА, хәажәкыра 25 – Sputnik, Бадраҟ Аҩӡба. Акоманда "Афон" аҳҭнықалақьтә команда "Динамо" иаԥнагеит 2:1 ҳәа. Абри атәы арадио Sputnik адырраҭара "Дополнительное время: мир футбола ConIFA" аҟны еиҭеиҳәеит Лаша Кәаӷәаниа.
"Акоманда "Афон" адисквалификациа иахҟьаны ахатәы стадион аҿы изыхәмаруам азы, изцыхәмаруа рыстадионқәа рҿоуп иахьықәгыло", - иҳәоит иара.
Ахәмарраҿы рымчқәа еиҟаран. Дарбанзаалак илшон аԥыжәара агара, аха аҟәатәи "Динамо" ахәмарыҩцәа рыхәмарра еиҳа аинтерес аҵан ҳәа азгәеиҭоит Кәаӷәаниа.
"Динамо" ашьапылампыласыҩ Ника Гужба актәи ампыл ҭаиршәит. Аҩбатәи ампыл амба иҭаиршәит акоманда "Афон" ахәмарыҩ Леонид Логәуа. Саид Жьиба акәакь аҟынтә дзысыз ампыл аанызкылаз ашьапылампыласыҩ ихатәы мба иҭаиршәаит. Абас ала, 2:1 ҳәа "Афон" аиааит.
Абри ахәмарра ашьҭахь "Афон" 17 очко аманы атурниртә таблицаҿ аҩбатәи ацәаҳәаҿы игылоуп. Абри аҭыԥ аҿы игылоуп "Гаграгьы". Аха гаграа афонаа ираԥыргар ауеит, избанзар ажәбатәи атур аҿы ахәмарра рзыԥшуп. Иара убри аҩыза аҭагылазаашьа амоуп гәдоуҭатәи "Риҵа", уи "Нарҭ" иацыхәмарраны иҟоуп.
Ашьапылампыл азы Аԥсны ачемпионат иалахәуп акомандақәа фба: "Нарҭ", "Гагра", "Риҵа", "Афон", "Самырзаҟан", аҟәатәи "Динамо".
