АҞӘА, лаҵара 28 – Sputnik, Бадри Есиава. Урыстәыла ФМБА амедицинатә гәыԥ аҳақьым хада Борис Александров иажәақәа рыла Аҟәеи Аҟәа араиони рҿы адиспансеризациа иахысит 3500-ҩык ауааԥсыра.
"Иара убасгьы адиспансеризациа иахысит 500-ҩык ахәыҷқәа. урҭ рҟынтәи ирацәан – анервтә система, аԥсыԥлагаҩагаратә система, агәы ачымазара здырбалаз. Адуцәа рыбжьара еиҳарак иазгәаҭан аҷаҷа чымазара, агәчымазара, акьыбачымазара", - иҳәоит Александров.
Иара иазгәеиҭеит аҳақьымцәа ргәаанагарала Аҟәа адиспансеризациа ишахәҭаз еиԥш имҩаԥысит ҳәа.
Аԥсны азеиԥш диспансеризациа хацыркын мшаԥы 5 2019 шықәса рзы Гал араион аҿы. Абри ашьҭахь етап-етапла адиспансеризациа мҩаԥган Тҟәарчал, Гәылрыԥшь, Очамчыра, Аҟәа араионқәа руааԥсыра рзы.
Лаҵара 28 - 30 рзы адиспансеризациа мҩаԥысуеит Афон Ҿыц, лаҵара 31 рашәара 3 рзы Гәдоуҭа, Гагра араиони Пицундеи – рашәара 4 - 9 рзы.