АҞӘА, рашәара 6 – Sputnik, Бадраҟ Аҩӡба. Европа ачемпионат ConIFA-2019 алахәылацәа ажәытә қалақь Шуши иаҭааны иҟан ҳәа Sputnik иазеиҭеиҳәеит ашьапылампыл азы Аԥсны Афедерациа апресс-маӡаныҟәгаҩ Алхас Манаргиа.
"Шуши аҭоурых ду змоу қалақьуп. Ҳара аԥхьа Асахьаҭыхратә галереиа ҳаҭааит. Уа ицәыргаз аусумҭақәа даара иаҳгәаԥхеит", - иҳәеит иара.
Атмосфера ханарҭәаауан дудук (амузыкатә инструмент – аред.) абжьы.
"Дудук абжьы асахьаҿ иубо уазааигәанатәуеит", – иҳәеит Манаргиа.
Уи ашьҭахь Аԥара амузеи ишаҭааз иҳәеит.
"Аерманцәеи аԥареи синонимқәоуп уҳәар ауеит. Убри ауп уа амузеигьы зрымоу. Абри ашьҭахь аԥсабарахь шьыбжьхьафара ҳаҟан", - еитеиҳәоит Манаргиа.
Акультуратә программа аконцертгьы алан.
"Ари ауснагӡатә далахәын Ашьха Ҟарабах аҳәынҭминистр Араик Арутиуниан. Иара иҳәеит аԥсуа команда ахәмаршьа шидыруа. Уажәтәи рыхәмаррагьы ахә ҳаракны ишьеит", - иҳәоит Алхас Манаргиа.
Аԥсныи Мраҭашәаратәи Ермантәылеи рыбжьара афиналбжаҿтәи ахәмарра мҩаԥысраны иҟоуп рашәара 6 асааҭ 17:30 рзы.
"Ҳара ауснагӡатә аҟынтәи зегь раԥхьа ҳақәҵит, ахәмарра аламҭалаз ҳаԥсы ҳшьарц", - еиҭеиҳәоит Алхас Манаргиа.
Ашьапылампылтә ассоциациа ConIFA шьаҭаркуп рашәара 7 2013 шықәса рзы. Еиднакылоит FIFA иаҵанамкуа 40 команда.