АҞӘА, цәыбба 24 — Sputnik, Бадри Есиава. Апатриоттә акциақәа ҩба "Афырхацәа рышьҭралеи" "Ҳфырхацәа рымҩеи" Аԥсны имҩаԥгахоит Аиааиреи Ахьыԥшымреи рымш азы ҳәа Sputnik акорреспондент изеиҭарҳәеит акциақәа реиҿкааҩцәа Нар Ҭаниеи Алиас Голанӡиеи.
Акциа "Афырхацәа рышьҭрала" алахәылацәа Ԥсоутәи аҳәынҭқарратә ҳәаа инаркны амҩа иқәлоит цәыббра 29 рзы, Аҟәанӡагьы иааӡараны иҟоуп цәыббра 30 рзы.
"Шьапыла Ԥсоу инаркны Аҟәанӡа шьапыла амҩа ҳанысуеит. Иахьатәиала акциа алахәхара зҭаху рсиа 74-ҩык инаӡоит. Иара еиҳа-еиҳа иацлоит. 120-ҩык иреиҵахарым ҳәа ҳгәыӷуеит", - иҳәоит Ҭаниа.
Иара убасгьы иазгәеиҭеит акциа алахәылацәа аибашьцәа рбаҟақәа рҿаԥхьа иааҭгыланы ашәҭшьыҵәрақәа шьҭарҵараны ишыҟоу. Дара рнапаҿы иркуеит Аԥсни Аахыҵ Уаԥстәылеи рбираҟқәа.
"Аԥсны ажәытә бираҟқәа ҳзыԥшаар, урҭгьы мҩанаагон. Убас ҟаҳҵеит 2007 шықәса рызгьы. 12 шықәса ирықәуп абри акциа мҩаԥаагоижьҭеи. Ҵыԥх акциа Аԥсны мрагыларатәи ахәҭаҿы имҩаԥган. Абас инеиҭак-ааиҭакны имҩаԥаагалар еиҳа еиӷьны иҳаԥхьаӡеит", - иҳәеит иара.
Акция "Ҳфырхацәа рымҩалагьы" цәыббра 29 рзы ахы акуеит, аха иара алахәылацәа Егрынӡа инаӡараны иҟоуп.
"Аҟәантәи Егрынӡа ҳамҩа хоуп. Алахәылацәа рсиа аиҿкаара ҳаҿуп. Ҵыԥх ҳара 80-ҩык ҳаҟан. Аҵара аминистррахь ааԥхьара ҟасҵар сҭахуп астудентцәеи ашколхәыҷқәеи акциа шымҩаԥгахо азы адырра рырҭарц", - иҳәеит Голанӡиа.