АҞӘА, жьҭаара 29 - Sputnik. Аҵәҭаԥсара инақәыршәаны аԥснытәи аспортсмен Баџьа Хәытаба актәи индаҭлаҩ ихьӡ еилкаахеит. Баџьа диндаҭлоит Египттәи аспортсмен Абдалла К. абри атәы ааицҳаит Баџьа иазыҟаҵаҩ Баграт Хәытаба.
"Жьҭаара 29 асааҭ 12:30 рзы 125 кьыла рҟынӡа зкапануа еицлабуеит. Шьамтәылатәи арабтә республика ахьӡала дықәгылоит аԥснытәи аспортсмен Баџьа Хәытаба. Дзындаҭло египеттәи аспортсмен адунеи ачемпионат аԥхьахә имоуп, Азиатәи ахәмаррақәа рыԥхьахә ианашьоуп, Египет дачемпионуп", - иҳәеит азыҟаҵаҩ.
Иара убасгьы иазгәеиҭеит Баџьа аиааира ихы ақәкны дшыҟоу.
"Ахьтәы медал аиура ҳазыԥшуп", - иҳәеит Баграт Хәытаба.
Баџьа Хәытаба Нур-Султан имҩаԥысуаз ақәгыларақәа рышьҭахь Токио 2020 шықәса рзы имҩаԥысраны иҟоу Аолимпиатә хәмаррақәа рахь апутиовка иҽаԥсеитәхьеит.