АҞӘА, ԥхынҷкәын 3 – Sputnik. Сариа Лакоба лгәалашәара иазку ахәылԥаз мҩаԥысуеит ԥхынҷкәын 5 рзы РУСДРАМ аҿы ҳәа арадио Sputnik иазеиҭеиҳәеит Фазиль Искандер ихьӡ зху Аурыс драматә театр адиректор хада Иракли Хынҭәба.
"Сариа Лакоба лгәалашәара иазку ахәылԥаз - РУСДРАМи, Нестор Лакоба ихьӡ зху амузеии, Аԥсны акультура аминистрреи еицымҩаԥырго проектуп. Ахәылԥаз амемориалтә хәылԥазы инахыҳәҳәоит, атеатртә қәгылара иазааигәоуп. Аҩналара хәыда-ԥсадоуп. Изҭаху зегь ааир ҟалоит", - иҳәеит Хынҭәба.
Ақәгылара иалахәхоит РУСДРАМ актиорцәа. Аматериалқәа рыдигалеит аҭоурыхдырыҩ Станислав Лакоба.
"Сариа Лакобеи Нестор Лакобеи ртрагедиатә ҭоурых ауаа ирдыруазароуп", - ҳәа азгәеиҭеит Хынҭәба.
Станислав Лакоба аинтерес ду зҵоу аматериалқәа еизигеит, аиҳаракгьы Сариа Қарҭ дызҭагылаз ахҭысқәа рганахьала.
Сария Лакоба – Нестор Лакоба иԥҳәыс, 1937 шықәса рзы дырбаандаҩын. Абахҭаҿы акыр ддыргәаҟит, Нестор ажәлар драӷоуп ҳәа лдырҳәарц, аха лара уи дақәшаҳаҭымхеит. Дыргәаҟны лыԥсҭазаара далхын.
Сариа Лакоба анышә дахьамадоу еилкаам.
Иара убас шәаԥхьар ҟалоит:
Малиаԥҳа Сариа Лакоба лгәалашәара иазку ахәылԥаз азы: ателемарафон рылаҳәара ҳгәы иҭоуп
"Насыԥ змаз аҩны": ара инхон Сариеи Нестори
Диана Задеԥҳа: сандуи сабдуи Сариа Лакоба лзы ашәы ршәуп ҳәа, Аԥсны иахцан