АҞӘА, хәажәкыра 30 – Sputnik, Бадри Есиава. Акоронавирус здырбалаз аԥҳәыс Аԥсны аҵакырахь далалеит хәажәкыра 29 рзы Урыстәыла аҵакыраҟынтәи. Абри амш азы уа иҷаԥшьоз аҳазалхыҩцәеи аҳәаахьчаҩцәеи ахыԥхьакра рыдырҵеит ҳәа еиҭалҳәеит ареспублика асанитартә ҳақьым хада Лиудмила Скорик.
"Ишьақәыргылоу адиагноз аиашареи аиашамреи ирыхьмырԥшкәа аушьҭырҭатә ҭыԥ "Ԥсоу" аҿы ихымԥаданы иҟаз апрофилактикатә уснагӡатәқәа зегьы мҩаԥаагеит. Абри амш азы уа иҷаԥшьоз аҳазалхыҩцәеи аҳәаахьчаҩцәеи рхы ԥхьаркырц рыдаҳҵеит. Ишьақәырӷәӷәам адыррақәа рыла аԥҳәыс хатә транспортла дахьынхоз ақыҭа Сабериоҟа (Папынырхәа - аред.) дцеит. Лара дзыҿцаауаз лыуацәа акарантин ахь ишьҭхоит", - лҳәеит Скорик.
Лара иара убасгьы иазгәалҭеит Ԥсоутәи аҳәаа иахысуа зегьы атепловизор ахархәарала ишгәарҭо, аха ари аԥҳәыс усҟан лшоура халан дшыҟамыз. Ус акәымзар, амедикцәа лара ашәҟәы дҭаргалон.
Уаанӡа Аԥсуа телехәаԥшра аефир аҿы акоронавирустә инфекциа аламырҵәаразы Акоординациатә штаб алахәыла, адепутат Алхас Џьынџьал иҳәеит ачымазаҩ адиагноз "акоронавирус" шылзықәдыргылаз. Лара Жәыргьыҭтәи ахәышәтәырҭаҿы дышьҭоуп.
Иара убас шәаԥхьар ҟалоит:
- Аԥсны Аҳәынҭавтоинспекциа апостқәа рҟны аҳақьымцәа ҷаԥшьалоит