АҞӘА, мшаԥы 23 – Sputnik. Иахьа Аԥсны ахадас иалху Аслан Бжьаниа иҭоубашьҭаҵара мҩаԥысуеит. Ауснагӡатә хацыркхоит асааҭ 12:00 рзы Аԥсны ахада Иусбарҭа аконференц-зал аҿы.
Аԥсны иалху ахада ҿыц Аслан Бжьаниа иҭоубашьҭаҵара мҩаԥысраны иҟоуп ауаа рацәа адымгалакәа, атәылаҿ иҟоу аҭагылазаашьа инадҳәаланы ҳәа иҳәоит Аԥсны Ашәарҭадаратә хеилак амаӡаныҟәгаҩ инапынҵақәа назыгӡо Беслан Кәыҵниа.
Ауснагӡатә иалахәхоит Апарламент адепутатцәа, Алхратә комиссиа хада алахәылацәа, Иреиҳаӡоу аӡбарҭа ахантәаҩы.
Уаанӡа атәыла ахада Апарламенти Иреиҳаӡоу аӡбарҭеи рлахәылацәа рҿаԥхьа ҭоуба иуан. Аха 2014 шықәса рзы иаԥҵан Аконституциатә ӡбарҭа, уи аахыс ахада иҭоубоура мҩаԥысуеит Апарламенти Аконституциатә ӡбарҭеи рлахәылацәа рҿаԥхьа.
Ишьақәыргылоу апроцедура инақәыршәаны, иалху ахада ҭоуба шьҭеиҵоит, уи ашьҭахь Аԥсны ахада инапынҵақәа назыгӡо уи инапаҿы ииркуеит аҳәынҭқарратә символқәа – амҳәыр, аштандарт, алабашьа, аҳәа.
Аԥсны ахада иалхрақәа мҩаԥысит хәажәкыра 22 рзы. Алхрақәа рҟны аиааира игеит Аслан Бжьаниа, иара изы иарҭеит 56,5% абжьқәа. Адгәыр Арӡынба иоуит 35,42% бжьы, Леонид Ӡаԥшьба – 2,22%, зегьы ирҿагыланы – 1,75%.
Иара убас шәаԥхьар ҟалоит:
Аԥсны ахада иҭоубашьҭаҵара аҳәаанырцәтәи асасцәа аламырхәӡакәа имҩаԥысуеит
Аԥсны Апарламент ахь алхрақәа ҟалоит ахада иҭоубашьҭаҵара ашьҭахь