АҞӘА, мшаԥы 30 - Sputnik, Асмаҭ Ҵәыџьԥҳа. Аҟәатәи атроллеибусқәа русура иалагоит лаҵара 1 инаркны ҳәа Sputnik иазеиҭеиҳәеит АУН "Аҟәа ақалақь ахадара атроллеибустә усбарҭа" адиректор Ҭемыр Амҷба.
Иара иажәақәа рыла, атроллеибусқәа фба "Аџьармыкьа- Аҳабла ҿыц", хԥа – "Алашарбага-Ҭҳәыбын", ҩба - "Ажәытә ҳабла -Аџьармыкьа" ахырхарҭақәа рыла аусура иалагоит асааҭ 5:38 инаркны.
"Есыҽны аус ҳаулоит. Иҟалоит асааҭ 21:00 рҟынӡа аус рымуазаргьы, аха асааҭ 20:30 рҟынӡа аус рулоит. Есыуаха асанитартә рыцқьара мҩаԥаагалоит", - ҳәа иҳәоит иара.
Ауааԥсыра акоронавирус рацәыхьчаразы акоординациатә штаб аилатәара мҩаԥысит Аԥсны аԥыза-министр Александр Анқәаб далархәны мшаԥы 29 рзы.
Уа иӡбан ауаажәларратә транспорт лаҵара 1 инаркны аусура иалагарц.
Ақалақьтә транспорт аус аулоит есыҽны, ақалақь иаԥну – аџьармыкьа аусура амқәа раан. Ақалақьбжьаратә транспорт аусура ԥкуп лаҵара 15 рҟынӡа.
Иара убас шәаԥхьар ҟалоит:
- Ақалақьтә транспорт лаҵара 4 рышьҭахь аусура иалагоит