АҞӘА, ԥхынҷкәын 9 - Sputnik. Анардадаҩцәа аҳасабырба ҟарҵеит Аԥсны аԥыза-министр ихаҭыԥуаҩ, аекономика аминистр Кристина Озганԥҳа лҿаԥхьа Гәлиа, Џьонуа, Абазақәа рымҩақәа рҿы ӡыла аиқәыршәараз аусурақәа шцо аганахь ала. Абри атәы аанацҳауеит Аекономика аминистрра апресс-маҵзура.
"95% зегь хиоуп. Мчыбжьык ашьҭахь аусурақәа зегьы хыркәшахоит", ҳәа азгәаҭоуп адырраҭараҿы.
УКС аиҳабы Тимур Агрба аминистр агәра лиргеит ақәаршҩы-коллектор аремонт азура шакәу инхаз. Арҭ амҩақәа 2021 шықәса актәи аԥшьбара азы акаҭран рықәҵахоит.
Озганԥҳа аилахәыра "Аԥсныргылареи" аилахәыра "Аӡыканали" ҭабуп ҳәа ралҳәеит аграфик иахьаԥысуазы. Лара аусурақәа назмыгӡац аграфик еиԥырҟьар шалшо азы агәҽанҵара рылҭеит.
"Инагӡам аусурақәа ирылҵшәахоит уаҳа аус шәыцмура. Аҿҳәара иақәыршәаны аус нагӡатәуп. Ауаа адыжәгал. Уахи-ҽни инеиԥшьны аус жәула, аха алҵшәа сшәырба", - лҳәеит Озганԥҳа.
Аргылаҩцәа ирҳәеит Цандрыԥшь акаҭран ақәҵара 70 процент ишынарыгӡахьоу, Пицундатәи амҩа – 30 процент. Аусурақәа мҩаԥысуеит ашьыжь асааҭ 6 инаркны илашьцаанӡа. Иара убасгьы лассы ихыркәшахараны иҟоуп Гәдоуҭа араион Ҟәланырхәа ақыҭа аӡеизакырҭа аремонт.
Аԥсны аԥыза-министр ихаҭыԥуаҩ, аекономика аминистр Кристина Озганԥҳа аилацәажәара мҩаԥылгеит Аинвистициатә программа анагӡара азҵаарақәа ирызкны ԥхынҷкәын 8 рзы.
Аилацәажәараан ишьҭыхыз апроблематә зҵаарақәа зегьы ҷыдала хылаԥшра рылҭалоит Кристина Озганԥҳа.