АҞӘА, ԥхынҷкәын 11 - Sputnik. Аԥсны азыхиоуп урыстәылантәи афымцалашара адкылара ҳәа Sputnik иазеиҭеиҳәеит АУН "Амшынеиқәафымцамч" апресс-маӡаныҟәгаҩ Алхас Гагәылиа.
Гагәылиа иажәақәа рыла урыстәылатәи аган идырдырын дара ззыҳәо атехникатә хышәаҵышәақәа зегьы шеиқәдыршәаз.
Уаанӡа ЕгрыГЕС Џьуартәи аӡеизакырҭаҿы аӡы аҩаӡара ԥхынҷкәын 25-27 рзы иреиҵаӡоу аҩаӡараҟынӡа илаҟәуеит ҳәа "Амшынеиқәафымцамч" изаамҭанытәим аилатәараҿы иҳәеит анаплакы адиспетчертә маҵзура аиҳабы Гурам Џьаџьаиа.
"Џьуартәи аӡеизакырҭаҿы аӡы аҩаӡара 420 метра рҟынӡа илаҟәыр, урыстәылатәи алашара х-ҳауатә цәаҳәак: 500, 220, 110 киловольт рыла агара ҳақәшәоит. Убасҟан ауп Аԥсны иаҭаххо афымцалашара анҳауа", - иҳәеит Џьаџьаиа.
Аҟазауаҩ иҳәеит иахьазы Урыстәылатәи алашара шыҟам, аха Џьуартәи аӡеизакырҭаҿы иҟоу аҭагылазаашьа атәы Урыстәыла аекономика аминистрра идырдыруп.
Алхас Гагәылиа иҳәеит астанциа маҷ "Аҟәа-1" аҿы иҟаз амцакра ахҟьаԥҟьа хадақәа рҭыԥ ақәҵара шазыԥхьагәаҭоу ԥхынҷкәын 15 рҟынӡа. Убри аан, иара иажәақәа рыла, иныҭкааны аҿҳәара аҳәара уадаҩуп, атехникатә уадаҩрақәа ахьырацәоу азы. Амаҵзурақәа зегьы рҽеиԥшьны аусура иаҿуп.
Ԥхынҷкәын 9 рзы ирылаҳәахеит Аҟәа афымцалашара анашьҭра аграфик ҿыц шыҟало. Ари аграфик ала ҩ-сааҭк рыбжьара ҩ-сааҭк алашара дырцәалоит Аҟәа агәы, Алашарбага араион, "Колос" инаркны Ацҳа ҟаԥшь аҟынӡа.