АҞӘА, хәажәкыра 10 - Sputnik. Шәача имҩаԥысит Аԥсны иҟоу Урыстәыла АҲМ ахаҭарнак Константин Козлов Краснодартәи аҳазалхырҭа аиҳабы Наталиа Полосухина дылԥылеит ҳәа аанацҳауеит Краснодартәи аҳазалхырҭа апресс-маҵзура.
Аилацәажәара иалахәын Краснодартәи аҳазалхырҭа аушьҭырҭатә ҭыԥ Адлер ахаҭарнакцәа.
Аиԥылара азырхан ЕАЕС аҳазалхырҭатә ҳәаа иахысуа атранспорттә хархәагақәеи иахырго атауарқәеи хылаԥшра рыҭара азҵаарақәеи иааиуа акурорттә сезон аҽазыҟаҵара азҵаарақәеи.
Аԥсны аекспорттә лшара аизҳареи уи ауҭраҭыхтәи ашәыр-ргәыцтәи аалыҵи назлоу аноменклатуратә ҭбаареи рыҟазаараан иаԥҵатәуп адәныҟахәаахәҭра аҿиараз аҭагылазаашьақәа ҳәа рҳәеит аиԥылара алахәылацәа.
Аиԥылараҿ азхьаԥшра ҷыда рыҭан аушьҭырҭатә пункт аусуразы атехнологиатә зҵаарақәа, атехникатә хархәагақәа, ахаҿқәеи, атранспорти, атауарқәеи рганахьала аҳазалхратә операциақәа роптимизациа.
Урыстәылатәи аҳазалхырҭа адыррақәа рыла, акурорттә сезон (лаҵара-цәыббра) аан аушьҭырҭатә ҭыԥ "Адлер" анырра ӷәӷәа амоуп. Ииасыз ашықәс азы нанҳәа-цәыббра амзақәа раан аԥсуа-аурыс ҳәаа аҩхырхарҭак рахь иахысит 2 миллионк рҟынӡа хаҿи 500 000 транспорт хархәагеи.
Иара убасгьы ирылацәажәан азинхьчаратә усура азҵаарақәа. Аиԥылара алахәылацәа ԥхьаҟатәи реинырра ахырхарҭақәеи рҿаԥхьа иқәгылоу азҵаарақәа рыӡбара амҩақәеи ирылацәажәеит.