АҞӘА, хәажәкыра 31 – Sputnik. Аҟәатәи ақалақьтә еизара афбатәи ааԥхьара адепутатцәа еицҿакрыла ирыӡбеит Ажәытә ҳаблаҿы амҩасырҭа "Северный" Дмитри Гамгьиа ихьӡ зху амҩа ҳәа иҟаларцаз, Спортивнаиа амҩа Али Алиев ихьӡ ахҵазарц. Абри атәы аанацҳауеит Аҟәатәи ақалақьтә еизара апресс-маҵзура.
Арадио Sputnik аефир аҿы Аҟәатәи ақалақьтә еизара ахантәаҩы Дмитри Маршьан иҳәеит амҩақәа рыхьӡ аиҭакра заԥшьгамҭоу аҭыԥантәи ауааԥсыра шракәу.
Дмитри Гамгьиа Аԥсны Аџьынџьтәылатә еибашьра далахәылан, Кәыдрытәи аиҩхаа ахақәиҭтәраан, 2001 шықәсазы дҭахеит, "Леон" иорден ианашьоуп.
Али Алиев – ажурналист, аполитик, Нхыҵ Кавказ аҭоурых адырыҩ, акраамҭа Кавказ ажәларқәа Рконфедерациа апарламент ахантәаҩыс дыҟан, Аԥсны Аџьынџьтәылатә еибашьра хатәгәаԥхарала иалахәыз дреиуан.
Гамгьиеи Алиеви рҭоурых адепутатцәа ирзеиҭарҳәеит ирыцеибашьуаз рҩызцәа.