АҞӘА, мшаԥы 10– Sputnik, Асмаҭ Ҵәыџьԥҳа. Ашықәс иалагӡаны Аҟәа 4900 ковид-хҭыс азгәаҭан, иҳәеит Аҟәа ахада Беслан Ешба Аԥсны ауааԥсыра акоронавирустә инфекциа рацәыхьчаразы Акоординациатә штаб аилатәараҿы мшаԥы 9 азы.
Иара иажәақәа рыла 4533-ҩык згәы бзиахаз ашәҟәы иҭагалоуп, иахьазы ахыԥхьакраҿ иҟоуп 111-ҩык, рыхәышәтәра иаҿуп 166 пациент.
Ешба иазгәеиҭеит амчыбжь аҩныҵҟа 46 хҭыс аҭыԥ шрымаз. Адинамика шҵоуроугьы аҿкчымазаратә хәышәтәырҭа апациентцәа рыла иҭәуп. Иара игәаанагарала уи зыхҟьо егьырҭ араионқәа рҟынтәгьы Аҟәаҟа ҽыхәышәтәра иахьаауоуп.
Хара имгакәа ари ахәышәтәырҭаҿы аҟәша-цҵа аремонт азуны иалгоит. Уа акоронавирус зыдбало стационарла ирхәышәтәуеит, иҳәеит Ешба.
Аепидемиа иалагеижьҭеи Аԥсны акоронавирус зцәа иаланы иаадырԥшыз ауаа рхыԥхьаӡара 13645-ҩык ыҟоуп, ргәы бзиахеит 13101-ы, рыԥсҭазаара иалҵит 217-ҩык.
Акоординациатә штаб иахәҭаны иаԥхьаӡоит антиковидтә ԥкрақәа рыҿҳәара иацҵазарц алаҵаҟаҵара иалагаанӡа. Алаҵаҟаҵара ианалаго арыцхә макьана ишьақәыргылаӡам.
Иара убас шәаԥхьар ҟалоит: