АҞӘА, лаҵара 7 - Sputnik. Гагра араион ААР аштаб акурорт аҩнуҵҟа аԥхынтәи аамҭазы атуристцәа ршәарҭадареи ауаажәларратә зинеиҿкаареи рымҩаԥгаразы аплан аус адуланы аминистр идырдырит. Абри атәы аанацҳауеит Аԥсны ААР асаит.
Иазгәаҭоуп атуристтә маршрутқәа зегьы рҟны аусура шымҩаԥыргало амҩа-патрультә маҵзура аекипажқәа, ашьаҟатә патруль, инеиԥшьны аус шыруа аоператив-ҭҵааратә аҷаԥшьаратә гәыԥқәа.
Дмитри Дбар иҳәеит азхьаԥшра ҷыда шаҭахо акриминалтә милициа аусура. Иара иажәақәа рыла, амилициа ируалуп агәҽанҵара-профилактикатә усура арӷәӷәара акурорт раионқәа рҿы ацәгьоурақәа рыларҟәразы.
Дбар иазгәеиҭеит дарбанзаалак амилициа аусзуҩ атуристцәа рганахьала ипрофессионалтәи иуаҩышьатәи ҟазшьақәа ааирԥшлар шакәу.