АҞӘА, лаҵара 18 – Sputnik, Бадри Есиава. Таитәи абокс азы гагратәи аспортсменкацәа Кристинеи Елинеи Беииаԥҳацәа, Валериа Дашьчиан аҩбатәи аҭыԥқәа ааныркылеит Урыстәыла аиндаҭлараҿы, азингьы роуит Европа аиндаҭлара иалахәхарц. Абри атәы Sputnik иазеиҭеиҳәеит таитәи абокс азы Аԥсны Афедерациа ахада Ҭемыр Гьергьедаа.
"Таитәи абокс азы Европатәи аиндаҭларахь ацара рылшеит, аха макьаназ аинформациатә шәҟәы ҳмоуцт аиндаҭлара аныҟалои иахьыҟалои рзы. Апандемиа иаалагазар ҳаспортсменцәа џьаргьы имцацызт. Исҳәар сҭахуп Гагра араион ари аспортхкы аҿы Аҟәа иаваҟәало ишыҟалаз", - ҳәа иҳәеит иара.
Ҭемыр Гьергьедаа иара убасгьы иҳәеит таитәи абокс азы Аԥсны Афедерациеи апанкратион (еилаԥсоу ақәԥарахкы) азы Москватәи алигеи аусеицураз аиқәшаҳаҭра рнапы шаҵарҩыз, уажәы ишалацәажәо апанкратион азы Адунеи раԥхьатәи ачемпионат Аԥсны амҩаԥгара азҵаара.
Иара иҳәеит ареспубликаҿы таитәи абокс ахь ишныҟәо 250-ҩык аҿар. Аҟәа, Гагра, Цандрыԥшь, Аҟәа араион рҿы аус ауеит аклуб "Гьаргь Аиааирагаҩы" ("Георгий Победоносец") асекциақәа. Аклуб аадыртраны иҟоуп Гәдоуҭеи Гали рҿгьы.
"Азыҟаҵаҩцәа разыҟаҵара ҳаҿуп. Ҩыџьа аиҭаҽазыҟаҵара иахысхьеит. Урҭ рҟазара ацҵаразы иҳашьҭраны ҳаҟоуп таитәи абокс азы Урыстәыла Афедерациахь", - ҳәа иҳәеит Гьергьедаа.
Таитәи абокс азы Урыстәыла аиндаҭлара мҩаԥысуан лаҵара 11-18 рзы Москватәи аобласт аҿы. Ауснагӡатә иалахәын зықьҩык рҟынӡа.
Гагратәи асекциа ааӡаҩ Анастасиа Шьчитова ахԥатәи аҭыԥ аанылкылеит. Аҭыԥҳацәа азыҟарҵоит Андреи Дашьчиан, Владимир Каленџьан, Нико Саков.