АҞӘА, рашәара 19 – Sputnik. Аԥсны АҶА аӡхәыҵалаҩцәа Гагра амшын иагаз атурист иԥшаара иацырҵеит рашәара 19 шьыжьнаҵы, абри атәы аанацҳауеит аиқәырхаратә усбарҭа апресс-маҵзура.
Урыстәыла атәылауаҩ Нестеров Михаил Николаи-иԥа Гагра ақалақь иахьаҵанакуа амшын аҿы дӡааҟәрылеит рашәара 17 рзы.
Амшын ацәгәырԥа ӷәӷәеи ахәашьреи ирыхҟьаны аӡхәыҵалаҩцәа рыԥшаарақәа макьана илыҵшәадоуп, абас азгәаҭоуп адырраҭараҿы.
Сынтәа амшынҭалара аартын рашәара 5 рзы. Аҟәарақәа ррыцқьара иалагеит мызкы шыбжьаз.