АҞӘА, ԥхынгәы 18 - Sputnik. Ԥхынгәы 17 ахәылбыҽха Аҳабла ҿыц аҿы иҟалаз аиҿахысраан ауаҩшьра ҟаиҵеит ҳәа агәызҩара ззыҟоу ахаҿы даанкылоуп ҳәа адырра ҟанаҵоит Аԥсны аҩнуҵҟатәи аусқәа рминистрра апресс-маҵзура.
Аҩнуҵҟатәи аусқәа рминистрреи Аҟәатәи амилициеи ршьаусԥшааратә усбарҭақәа еицымҩаԥыргаз аоперативтә ԥшаарақәа ирыбзоураны даанкылоуп 1979 шықәса рзы ииз Аҷандара инхо Игор Енварбеи-иԥа Гәдалиа.
Аусбарҭа адыррақәа рыла, аиҿахысра ҟалеит асааҭ 19:54 рзы, Цәыббра 30 амҩа, №8 аҩны аҿаԥхьа.
Ихәыз хҩык ацхыраара рыҭаразы Ареспубликатә хәшәтәырҭахь инаган.
Руслан Гәдалиеи Беслан Ӡыбеи иаразнак рыԥсҭазаара иалҵит, Аслан Зыхәба ареанимациаҟны днаргеит. Аухаҵәҟьа аоперациа изыҟарҵеит. Уажәазы апалатахь диаргахьеит. Уи иԥсҭазаара акгьы аԥырхагам.
Аԥсны ААР ашьаусԥшаара-оперативтә гәыԥи аексперт-криминалисттә центр аспециалистцәеи аусура иаҿуп. Имҩаԥыргоит ари ацәгьоура ҟазҵаз ахаҿқәа рыԥшааразы ауснагӡатәқәа.
Апрокуратура хада ари ахҭыс азы ашьаус хацнаркит.