АҞӘА, цәыббра 2 – Sputnik, Бадри Есиава. Аԥснынтәи Урыстәыла иалало автомашьынақәа реиҿкаара аамҭа иацлеит апрограмматә еиқәыршәара ҿыц ахь иахьиасуазы ҳәа Sputnik иазеиҭарҳәеит Краснодартәи аҳазалхырҭа Шәачатәи аусбарҭа апресс-маҵзура.
"Аушьҭырҭатә ҭыԥқәа рҿы аҳазалхратә еиҿкаареи аҳазалхратә хылаԥшреи автоматикатә системахь риагаразы апрограмматә еиқәыршәара ҿыц ахь аиасра инадҳәаланы атранспорт хархәагақәа раара, рцара аиҿкаара аамҭа иацлеит. Уажәазы аинформациа-программатә еиқәыршәара аусура аларгаразы аусурақәа мҩаԥысуеит", - ҳәа рҳәеит апресс-маҵзураҿы.
Уи адагьы иазгәаҭоуп апрограмматә еиқәыршәара ҿыц аусура иалагар, аҳазалхратә хылаԥшра аамҭа акыр ишарласуа.
Аԥсны ашәҟәы иҭагалоу амашьынақәа Урыстәыла иахьалалоз аиԥынгылара иалашәеит, сааҭла игылеит нанҳәа 31 аахыс.