АҞӘА, цәыббра 16 – Sputnik, Бадрак Авидзба. Аԥсыӡнхамҩазы аурыс-аԥсуа комиссиа абыжьбатәи асессиа мҩаԥысуеит Аҟәа цәыббра 16-17 рзы.
Аиԥылара аартуа Аԥсны ақыҭанхамҩа аминистр ихаҭыԥуаҩ, аԥсуа делегациа ахада Артуш Сарибекиан урыстәылатәи иколлегацәа аԥсшәа раҳәо агәыӷра ааирԥшит русура хра аманы ишымҩаԥысуа азы.
"Ҳара иахьа ара ҳаизеит аԥсыӡнхамҩазы аурыс-аԥсуа комиссиа абыжьбатәи асессиа амҩаԥгаразы. Иҟоу аепидемиологиатә ҭагылазаашьа иахьмырԥшыкәа арахь аара шәылшеит. Сақәгәыӷуеит аилатәара хра аманы имҩаԥысып, аилибакаара ҟалап ҳәа. Абыжьбатәи асессиа амҩаԥгараҟынӡа ҳнеихьазар уи шыҟало агәра згоит", - иҳәеит иара.
Аԥсыӡкразы афедералтә маҵзура Азов-Амшынеиқәатә ҵакыра аусбарҭа анапхгаҩы Игор Рулиов иазгәеиҭеит акомиссиа астатус ҳарак шамоу.
"Ашьыжь аԥыза-министр ихаҭыԥуаҩ, ақыҭанхамҩа аминистр, аԥсуа ган аделегациа аиҳабы Беслан Циба-иԥа Џьапуеи сареи ҳаиқәшәеит. Ҳара ҳаиқәшәарақәа агәра удыргоит Аԥсны Аҳәынҭқарра Амшын еиқәаҿы аԥсыӡкра иадҳәалоу азҵаарақәа хылаԥшра шырнаҭо", - ҳәа иҳәеит Игор Рулев.
Ҩымш имҩаԥысраны иҟоу асессиаҿы аганқәа алацәажаәраны иҟоуп амшынеиқәатә регион аҿы аԥсыӡкреи аквакультуреи рҭагылазаашьа, аӡытә биоресурсқәа рыҟазаашьа, аквакультуратә аалыҵ ааӡара, аԥсыӡааглыхратә ҭҵаарадырра аусбарҭақәа рыбжьара аҭҵаарадырра-техникатә усеицура аплан.
Иара убасгьы ирзааҭгылоит аӡынтәи аԥсыӡкраамҭазы иркуа ақамшьиа ахышәаҵышәа, аӷбақәа рыла уи акышьа аформа.
Иара убасгьы ишьақәдыргылараны иҟоуп 2021-2022 шықәсқәа рзы Аԥснытәи амшынтә ӡқәа рҿы ҭагалан-аӡын акразы ззин ыҟоу акамшьиа ахыԥхьаӡара, иҳәаақәырҵоит Урыстәыла аԥсыӡкыга ӷбақәа русура аҭагылазаашьа.