АҞӘА, цәыббра 21 - Sputnik. Алабораториа ҿыцқәа Гагратәии Очамчыратәии араионқәа рҿы ирымоуп алшара 100 гәаҭарак мышкала амҩаԥгара ҳәа лҳәеит Аԥсны СЕС аҳақьым хада Лиудмила Скорик аԥыза-министр Александр Анқәаб иԥылараан цәыббра 20 рзы.
Атәылауаа рыҭҵаара аҭак роур рылшоит абиоматериал анырга аҽныҵәҟьа ҳәа лҳәеит Скорик.
Араионтә лабораториақәа ахьаарту Аҟәатәи ареспубликатә санитар-бактериологиатә лабораториа русура еиҳа идырмариеит. Абри аус аҿы ацхыраара ҟанаҵоит амобилтә госпитальгьы, ара аус ауеит алабораториа ПЦР-ҭҵаарақәа рымҩаԥгаразы.
ПЦР-лабораториазы Гагра араион ахадара ахәышәтәырҭа хадаҿы аремонт ҟарҵеит. Иаразы амаругақәа аахәан ареспубликатә биуџьет аҟынтәи. Иара убас аремонт еиҿкаан Очамчыратәи алабораториагьы.
Иахьазы Аԥсны бжьаратәла 350-500 тест мҩаԥыргоит акоронавирус ашьақәыргыларазы.