АҞӘА, жьҭаара 4 - Sputnik. Аџьынџьтәылатә еибашьра аветеранцәеи Апарламент адепутатцәеи рыбжьара иҟаз ахҭыс инадҳәаланы имҩаԥгоу ауснагӡатәқәа азхоны иҟоуп аҭагылазаашьа аобиективла аилкааразы, абри атәы иҳәеит аусутә еилацәажәараҿы Апарламент аиҳабы Валери Кәарҷиа.
"Иҟоуп Аҩныҵҟатәи аусқәа рминистри ихаҭыԥуааи рмаҵура иамхзааит ҳәа изшьо, аха уи иахьазы аамҭала ԥхьатәара дахьыҟоу азхоны исыԥхьаӡоит аҭагылазаашьа аҭҵааразы", - иҳәеит Валери Кәарҷиа.
Кәарҷиа ааԥхьара ҟаиҵеит жьҭаара 1 азы адепутатцәа ирыдрымкылаз ақәҵара атекст азхоны иԥхьаӡазарц.
Апарламент адепутат Гарри Кокаиеи, Аӡҩыбжьа ақыҭантәи аибашьра аветеранцәеи, Аҩнуҵҟатәи аусқәа рминистр Дмитри Дбари инапаҵаҟа иҟаз ауааи рыбжьара аимак аҭыԥ аман цәыббра 30 ауха.
Абри аганахь ала Апрокуратура хада аусҭҵаара иаҿуп.
Цәыббра 30 ауха Апарламент адепутат Алмасхан Арӡынба Аԥсны ААР ахыбрахь днеины закәаншьаҭада имаз автомат "Калашников" ала ахысра ҭеиҵеит, анаҩс аҭыԥ аҟынтәи дыбналеит.
Аусҭҵаара мҩаԥысуанаҵы ахҭыс иалахәыз амилициа аусзуҩцәа аамҭала рмаҵурақәа рҟынтә рхы иақәиҭтәуп.
Аԥсны ахада Аслан Бжьаниа Москва иусутә визит аанкыланы Аԥсныҟа дхынҳәит Аҟәа аԥшаҳәаҿы цәыббра 30 рзы иҟалаз аимак аҵыхәала. Иара иарку аилацәажәара мҩаԥигеит. Аԥсны аҩнуҵҟатәи аусқәа рминистр Дмитри Дбар атәыла ахада диҳәеит ахҭыс аҭҵаара иахьынӡаҿу имаҵураҟынтә ихы дақәиҭитәырц. Дбар агәыӷра ааирԥшит ахҭыс иалахәыз адепутатцәагьы убасҵәҟьа рхы мҩаԥыргап ҳәа.
Аԥсны ахада Аслан Бжьаниа аиҳабыратә хыбрақәа жьҭаара 4 рзы ршәарҭадара рӷәӷәазарц.