АҞӘА, жьҭаара 8 - Sputnik. Аԥсны инхо аицџьынџьуаа Ркоординациатә еидгыла (КСОРС) иалоу зеижә еиҿкаара имҩаԥнагеит II Атәылақәа рконференциа уаҟа еихыршьаалеит иаҳхысыз ашықәсазтәи русура, иалацәажәеит 2022-2023 шықәсқәа рызтәи рхықәкқәа. Абри атәы аанацҳауеит аиҿкаара апресс-маҵзура.
Ауснагӡатә аҟны далхын КСОРС ахантәаҩы. Аҽазныкгьы хантәаҩыс далырхит Олег Иурченко. КСОРС Арегионалтә Координациатә хеилак аҿы хаҭарнакс далырхит Наталиа Каиун.
II Атәылақәа рконференциа мҩаԥысит Аҟәа москватәи акультура-усутә центр "Москва Аҩны" аҿы.
Уи иалахәын 22 еиҿкаара рделегатцәа, асасцәа, Урыстәыла Ацҳаражәҳәарҭа абжьгаҩ Максим Литвинов, Россотрудничество ахаҭарнакра анапхгаҩы инапынҵақәа назыгӡо Михаил Масаев, Аԥсны Ашәарҭадаратә хеилак амаӡаныҟәгаҩ Сергеи Шамба, аԥыза-министр ихаҭыԥуаҩ Сергеи Пустовалов.
Аконференциа аартуа Аидгыла ахантәаҩы Иурченко КСОРС ашықәстә усураз ажәахә ҟаиҵеит.
Ауснагӡатә аҿы Аслан Бжьаниа инаишьҭыз адныҳәаларатә шәҟәы даԥхьеит Ашәарҭадаратә хеилак амаӡаныҟәгаҩ Сергеи Шамба.
Анаҩс апресс-маҵзура, азиндырратә, агранттә ҟәшақәа рнапхгаҩцәа русуразы аҳасабырбақәа ҟарҵеит. Иазгәарҭеит иҟоу ауадаҩрақәеи аихьӡарақәеи ртәы.
Аконференциа аихшьаалақәа ҟаҵо ирыдыркылеит арезолиуциа.