АҞӘА, жьҭаара 14 - Sputnik. Аԥсны Иреиҳаӡоу аӡбарҭаҿы аусеилыргара иалагеит Жәлар реизара адепутатцәа Гарри Кокаиеи Алмысхан Арӡынбеи румҭаҿы ашьаус-харадҵаратә ҟазшьа аҟазаара аилкааразы ҳәа аанацҳауеит аӡбарҭа асаит.
Апрокуратура хада адыррақәа рыла цәыббра 30 ауыха Гарри Кокаиа иумҭа ахәҭаҷқәа ҩба – абжьахрақәеи амчра ахаҭарнакцәа ахьымӡӷ дыргареи ирыҵаркуеит. Адепутат Арӡынба иумҭа – Аԥсны ААР аҿаԥхьа 20 - нтә ахысра - абџьар закәаншьаҭада амазаара, аҵәахра, аныҟәгара рыхәҭаҷ иаҵанакуеит.
Адепутатцәа рдукатцәа Марина Ҭаниаԥҳаи Нонна Смырԥҳаи аҳәара ҟарҵеит агәаҭаратә материалқәа рыҭҵааразы аамҭа рыҭазарц. Иреиҳаӡоу аӡбарҭа аӡбарҭатә коллегиа, аӡбаҩцәа Роман Кәарҷиа, Есма Қорсаиа, Лиа Адлеиаԥҳа ари иақәшаҳаҭхеит.
Анаҩстәи аилатәара мҩаԥгахоит 2021 шықәса жьҭаара 15 азы.