АҞӘА, жьҭаара 20 – Sputnik, Асмаҭ Ҵәыџьԥҳа. Аԥсны ахада даҭааит астанциа маҷ "Бзыԥ-220", ара Аинвестпрограмма 2020-2022 аҳәаақәа ирҭагӡаны аремонттә усурақәа мҩаԥысуеит.
Ари ареспубликаҿы еиҳа идуу астанциа маҷқәа иреиуоуп. Уа иқәыргылоуп атрансформатор ҿыц, абҵарамзазы аҽакгьы ықәыргылахоит. Аиҭашьақәыргыларатә план иаҵанакуеит астанциа маҷқәа зегьы, 250 мегаватт еиҳау. Иахьазы амчхара 80-90 мегаватт амоуп.
Акапиталтә ремонт 2022 шықәса анҵәамҭаз ихыркәшахароуп.
Астанциа маҷ аиҭашьақәыргылара 540 миллион мааҭ иаԥсахоит. Уажәазы аҳарџь абжа ахархәара аҭоуп. Амыругақәа– 440 миллион мааҭ иаԥсоуп, егьырҭ аԥарақәа аргылареи аҵакыра аиҿкаареи ирыхәуп.
Ахада иара убасгьы даҭааит авольтҳарак цәаҳәа "Ԥсоу". Ара ааигәа иҟаз амшцәгьақәа ирыхҟьаны афымцацәаҳәатә шьаҟақәа хәба ааха роуит, урҭ ԥсахын.
Афымцацәаҳәа "Ԥсоу" аҳауатә цәаҳәа "Аҽгәара" ԥхасҭахар алашара анашьҭразы ицхыраагӡахоит. Ацәаҳәа аура 38,7 километра иҟоуп, амчхара –220 киловатт.