АҞӘА, жьҭаара 22 - Sputnik. Иҳаҩсыз уахыки-ҽнаки рыла акоронавирус рылоу ирыламу агәаҭаразы атестқәа рзыҟарҵеит 529-ҩык ауааԥсыра, урҭ рахьтә 160-ҩык аҿкы шрылаз аадырԥшит.
Гәдоуҭатәи ахәышәтәырҭаҿы рыԥсҭазаара иалҵит хҩык апациентцәа: 88 шықәса зхыҵуаз аԥҳәыси 52-еи 62-еи шықәса зхыҵуаз ахацәеи. Аҟәатәи амобилтә госпиталь аҿы лыԥсҭазаара далҵит 1935 шықәсазы ииз аԥҳәыс.
Абыржәтәи аамҭазы Гәдоуҭатәи араионтә хәышәтәырҭа хадаҿы ишьҭоуп 33-ҩык, рҭагылазаашьа бааԥсуп фҩык, ибжьаратәуп - 23-ҩык. Аҟәатәи аинфекциатә хәшәтәырҭаҿы ирхәышәтәуеит акоронавирус зцәа иалоу 33-ҩык, урҭ рахьтә жәаҩык апациентцәа рҭагылазаашьа уадаҩуп. Очамчыра ирхәышәтәуеит фҩык, Гагратәи ахәышәтәырҭаҿы - 16-ҩык, урҭ рахьтә ԥшьҩык рҭагылазаашьа уадаҩуп. Тҟәарчалтәи ахәышәтәырҭаҿы - быжьҩык апациентцәа. Аҟәа иҟоу амобилтә госпиталь аҿы - 78-ҩык апациентцәа, 12-ҩык рҭагылазаашьа хьанҭоуп.
Ауааԥсыра акоронавирус рацәыхьчаразы аоперативтә штаб ааԥхьара ҟанаҵоит аҿкы аламырҵәаразы иахәҭоу аԥҟарақәа ирықәныҟәаларц.