АҞӘА, жьҭаара 25 – Sputnik. Урыстәыла ауааԥсыра реиԥш, Аԥсныҟа иаауа егьырҭ атәылауаагьы ироуеит алшара COVID-19 аҟынтә алаҵаҟаҵаразы, урҭ Аԥсны атәылауаҩра рымоу ирымаму иахьмырԥшыкәа, абри атәы Sputnik иазеиҭалҳәеит Агәабзиарахьчара аминистрра апрофилактикатә цхыраара аусбарҭа аиҳабы Саида Делԥҳа.
Лара лажәақәа рыла алаҵаҟаҵаразы ухаҭара шьақәзырӷәӷәо ашәҟәы умазароуп, Аԥсны уахьынхо аҭыԥ зҵазкуа амедусҳәарҭахь унеироуп.
Аҟәа алаҵаҟаҵара ҟалоит ақалақьтәи Синоптәи аполиклиникеи, араионтә хәшәтәырҭақәеи рҿы. Алаҵаҟаҵара хәыдаԥсадоуп.
Асертификат аҭыԥ аҟны иуырҭоит.
Аԥсны ауааԥсыра, аҩныҵҟатәи атәылауаҩшәҟәы змоу, ма урыстәылатәи аҳәаанырцә тәылауаҩшәҟәы змоу, алаҵа ҟазҵаз ареспублика асанитар -епидемиологиатә маҵзураҿы Урыстәыла ахархәаразы QR-код роур ҟалоит, лҳәеит Делԥҳа.
Жьҭаара 10 рзы Аԥсны агәабзиарахьчара аминистрра иҟанаҵаз адыррақәа рыла акоронавирус аҟынтә "Спутник Лайт" ала алаҵа ҟарҵахьеит 2998-ҩык.
"Спутник Лайт" хәнызқь доза Аԥсныҟа иааган нанҳәа 6 азы. Аԥаразоужьра ихахьы игеит Москватәи аԥсуа диаспора ахада Беслан Агрба.