АҞӘА, жьҭаара 28 – Sputnik, Асмаҭ Ҵәыџьԥҳа. Аԥсны Аминистрцәа реилазаара аԥсахрақәа аланагалеит ахықәкытә программа "2021 шықәсазы ақыҭанхамҩа аҿиара".
Ақыҭанхамҩа аминистр Беслан Џьопуа ишиҳәаз ала, апрограмма аҵиааӡараз аныхрақәа рыхәҭаҷ аҟынтә аԥара амармалташь пты анырҵәара иазырхоуп.
Иахьа арҭ ауснагӡатәқәа ирҿуп. МТСқәа русура уалла имҩаԥыргоит. Убри азы апрограмма аԥсахрақәа алаагалоит. Иҟаҵоу аусурақәа рактқәа анааргалак урҭ рыхә ҳшәар алшоит. Апты аӡынра иҵалоит, уаанӡа ишалшо ала инырҵәатәуп.
Џьопуа иҳәеит ахәышәқәеи атехникеи раахәараз ацхыраара шыҟанаҵаз Урыстәыла ақыҭанхамҩа аминистрра.
Амармалташьтә пты Амшын еиқәа иаԥну аҭыԥқәа рыҟны ицәырҵит хәбаҟа шықәса раԥхьа. Ирласнгьы ареспублика иалаҵәеит. Аԥхасҭа анаҭоит аиаҵәара, ашәыр, ауҭраҭых.
2020 шықәсазы Урыстәыла Аԥсны иазыҟанаҵаз ацхыраарала иаашьҭын 130 миллион инеиҳаны. Арҭ аԥарақәа рыла иаахәан апестицидқәа, излархәшәтәуа аппаратқәа, атехника ҷыда, авиациа ахархәарала ахәшәқәҭәра. Ацхыраара ҟаҵан жәларбжьаратәи аиҿкаарақәа рҟынтәгьы. Аминистрра абиуџьет аҟынтәгьы 15 миллион мааҭ ныхын.
2020 шықәсазы амармалташь пты анырҵәаразы 400 000 тонна апестицидқәа аахәан.