АҞӘА, жьҭаара 28- Sputnik. Аԥыза-министр Александр Анқәаб ахархәара зҭоу афымцалашара ахә аизгара иацҵазарц анапынҵа ҟаиҵеит ҳәа аанацҳауеит Аминистрцәа реилазаара асаит.
Александр Анқәаб алашара ахәԥса аизгараз аҭагылазаашьа бааԥсуп, уи ԥсахтәуп ҳәа азгәеиҭеит.
Абри ахырхарҭаҿы аенергетикцәа ируалны ишьоуп аҭыԥантәи ахаланапхгараҭаратә усбарҭақәа рнапхгаҩцәа аус рыцыруларц, закәаншьаҭада афымцалашара ахархәара ахылаԥшрагьы абрахь иналаҵаны.
АУН "Амшынеиқәафымцамч" адиректор хада и.н. Ҭенгьиз Гырџьынба аиҳабыра рхада изеиҭеиҳәеит аҭагылазаашьа шыҟоу. Убас: 2021 шықәса ажьырныҳәа-цәыббра рыҩнуҵҟа 38% артәеит, 2020 шықәса иара убри аамҭазы –35,4%.
Гырџьынба иажәақәа рыла ари ажәамз рзы афымцатә цәаҳәақәа зҵалаз аидара 19,7% иҟоуп, 2020 шықәсазы – 25%.
Аԥсуа енергетикатә система акризис иҭагылоуп иахьажәу, аԥареизгара ахьылаҟәу, аидарақәа иахьрызҳауа азы. Аенергетика акризис алгаразы 4,7 миллиард мааҭ аҭахны ишьоуп.