АҞӘА, жьҭаара 28 - Sputnik. Алаҵа "Спутник V" Аԥсны аҵакыраҿы иҟазҵаз аршаҳаҭгеи ацифратә QR-коди роуеит. Абри атәы лҳәеит Аԥсны асанитар ҳақьым хада Лиудмила Скорик, ҳәа аанацҳауеит Аԥсныпресс.
Аԥсны агәабзиарахьчара аминистрра аусурақәа мҩаԥнагон алаҵа ззыҟаҵоу ауааԥсыра иаку релектронтә база аиқәыршәаразы. Уажәы алаҵа ҟазҵаз зегьы ҭелла SMS-дырра рырҭоит алогини апароли рзы, анаҩс дара ирылшоит агәабзиарахьчара аминистрра асаит аҟны ркабинет ҷыдахь аҭалара, уа иарбахоит алаҵазы адыррақәа.
Абҵарамза алагамҭазы Аԥсны иазыԥшуп алаҵа "Спутник V" 30 000 доза ааргоит ҳәа. Иара убасгьы иааргараны иҟоуп аимҳәазы алаҵа "Гриппол Плюс".
Уаанӡа алаҵа "Спутник V" ҟазҵахьаз абаклабораториахь Аԥсны атәылауаҩшәҟәи Урыстәыла аҳәаанырцәтәылауаҩшәҟәи рыманы инеир рылшоит QR-код аиуразы.
Ҳара ираҳҭо QR-код змоу алаҵаҟаҵаразы аршаҳаҭга зегьы азин рынаҭоит, урыстәылатәи алаҵа "Спутник V" ахьазхарҵо атәылақәа рҭаара.
QR-код змоу алаҵаҟаҵаразы аршаҳаҭга аҳәаа ахысраан аскан ахгара алшоит, иара убас аҭел иҭоугаларгьы ауеит.
"Спутник Лайт" алаҵа ҟазҵаз QR-код рырҭом, избанзар иара хымз роуп аҿкы аҟынтәи ахьчара аналшо.