АҞӘА, жьҭаара 29 - Sputnik. Амҩаду Аҟәа-Егры лашарала аиқәыршәара хацыркуп ҳәа аанацҳауеит Аԥсуа телехәаԥшра.
Аусура актәи аетап аан "Амшынеиқәафымцамч" аусзуҩцәа Аӡҩыбжьа-Лабра ахәҭаҿы ацинк зҿыкәыршоу, имжьакцо 600 шьаҟа дыргылоит.
Амҩа дырлашалоит 100 ваттк иҟоу алашарадиодтә лампақәа. Фымцалашарала аиқәыршәаразы иқәыргылахоит атрансформаторқәа хәба.
Апроект нагӡахоит Аинвестициатә программа аԥаразоужьрала. Аныхрақәа актәи аетап аан идыртәеит 74 миллион мааҭ.