АҞӘА, жьҭаара 31 - Sputnik. Алаҵа "Спутник Лайт" ахархәара аиуроуп аиҭалаҵаҟаҵаразы, актәи алаҵа аныҟауҵо аҩкомпонентк уоуроуп ҳәа аҳәамҭа ҟаиҵеит Урыстәыла агәабзиарахьчара аминистр Михаил Мурашко, абри атәы аанацҳауеит РИА Новости.
"Алаҵа "Спутник Лайт" хархәара аиуроуп аиҭалаҵаҟаҵаразы. Ҳара излаабо ала ауаа ироуа аимуннитет еиҳа ахаҭабзиара ҳаракуп алаҵаҟаҵара ҩ-етапк ианахысуа, убасҟан ауп еиҳа алҵшәа анбзиахо, агәабзиара еиҳа ахьчара аналшо", - ҳәа реиҳәеит Мурашко ажурналистцәа.
"Спутник Лайт" ала алаҵаҟаҵара Аԥсны иалагеит нанҳәа 10 инаркны. Жьҭаара 28 рызтәи аҭагылазаашьала уи рыларҵахьеит 3638-ҩык Аԥсны ауааԥсыра.
Алаҵа "Спутник V" 30 000 доза Аԥсныҟа иааргараны иҟоуп абҵарамза актәи ажәамш ирҭагӡаны. Алаҵа "Спутник V" Аԥсны аҵакыраҿы иҟазҵаз аршаҳаҭгеи ацифратә QR-коди роуеит.