АҞӘА, абҵара 6 - Sputnik. Аҟәа Абазақәа рымҩаҿы акаҭран ақәҵаразы аҽазыҟаҵаратә усурақәа ирылагеит ҳәа аанацҳауеит аҳҭнықалақь апресс-маҵзура.
Абазақәа рымҩаҿы аҩареизгарҭа акапиталтә ремонт хыркәшоуп, арыцқьарақәа ирҿуп, ацәхыԥқәа шьақәдыргылоит.
Ауаажәларратә палатаҿы имҩаԥгаз аиԥылараан Аҟәа ахада Беслан Ешба ишиҳәаз ала, раԥхьа иргыланы акаҭран ықәырҵоит еиҳарак амашьынақәа ахьырацәоу амҩақәа Џьонуа - Лакоба, Абазақәа рымҩа - Лакоба реихысырҭақәа.
"Иахьа (абҵара 5 - азгә.) акаҭран ақәҵаразы аҽазыҟаҵаратә усурақәа ирылагахьеит. Апалн ашьақәыргылара иаҿуп, уаанӡа иқәҵаз аԥҽыхақәа ықәырхуеит, ацрыҵцарҭақәа рҭыԥқәа рзырԥшаауеит, анаҩс акаҭран ишақәнагоу ашьҭаҵара алыршаразы. Аусурақәа ҳнардадаҩ имҩаԥигоит. Мышқәак рышьҭахь акаҭран ықәҵаны иалгоит", - иҳәеит Аҟәа ақалақь Анхамҩа-коммуналтә усбарҭа аиҳабы ихаҭыԥуаҩ Руслан Аҩӡба.
Абазақәа рымҩаҿы аҽазыҟаҵаратә усурақәеи акаҭран ашьҭаҵареи иаҿуп анардадаратә еиҿкаара "Аԥснырегионргылара".