АҞӘА, абҵара 11 – Sputnik. Аԥснытәи ашколхәыҷқәа урыстәылатәи ахәыҷтәы онлаин-университет иҭалар рылшоит. Абри атәы арадио Sputnik аефир аҿы еиҭеиҳәеит Аԥсны иҟоу Россотрудничество анапхгаҩ инапынҵақәа назыгӡо Михаил Масаев.
Урыстәылатәи ахәыҷтәы онлаин-университет ИАР атәылақәа, Аԥсны, Аахыҵ Уаԥстәыла рҟны аус аулоит. Ари Россотрудничествеи Алада-Мраҭашәаратәи аҳәынҭқарратә университети ргуманитартә проект ауп.
“Ауниверситет аԥсабара-ҭҵаарадырратәии атехникатәи хырхарҭа амоуп. Аҵара аҳәаақәа ирҭагӡаны Урыстәылатәи ахәыҷтәы онлаин-университет аҿы ахәыҷқәа ирҵалоит: аматематика, афизика, ахимиа, акосмос, атехникатә дисциплинақәа уҳәа. Урыстәылатәи ахәыҷтәы онлаин-университет аҿы ахәыҷқәа аинформациа ҭбаа роулоит, рызҵаарақәа рҭак ҟанаҵалоит. Арҵаҩцәа реилазаара акәзар реиҳарак профессортә еилазаароуп”, –иҳәеит Масаев.
Ауниверситет ахь ирыдыркылоит х-ҩаӡаракны: 7 - 9, 9 – 11, 11 - 14 шықәса зхыҵуа ахәыҷқәа. Россотрудничесто ахаҭарнак иажәақәа рыла, ауниверситет аҿы аҵаразы ахәыҷы ииҭаххоит акомпиутер, асмартфон ма апланшет.
Урыстәылатәи ахәыҷтәы онлаин-университет аҿы аҵаразы RCHU.ORG асаит аҿы аҽҭаҩреи, анкета ахарҭәаареи аҭахуп.
"Уажәазы аҭаацәа рҟынтәи арзаҳалқәа еизыргоит. Уи азы асаит аҿы анкета харҭәаатәуп. Аҵара ԥхынҷкәын азы иалагар ҟалоит. Акурсқәа аԥара рхыршәаауеит ", — иҳәеит Михаил Масаев.
Россотрудничество ахаҭарнак иҳәеит ауниверситет итрадициатәу ашкол шамԥсахуа, ахәыҷқәа абжьаратә школқәа рҟны ироуа адыррақәа ханарҭәаауеит.