АҞӘА, абҵара 11 – Sputnik. Урыстәыла ахада Владимир Путин ЕАА Амшын еиқәаҿы ахымҩаԥгашьа агәҭынчымра изцәырнагоит, абас аҩуеит РИА Новости ахада ипресс-маӡаныҟәгаҩ Дмитри Песков иажәақәа шьаҭас иганы.
"Еиду аштатқәа Амшын еиқәаҿы ахымҩаԥгашьа агәҭынчымра инаҭом, уи атәы иаартны иҳәеит", - иҳәеит Кремль ахаҭарнак азҵаара аҭак ҟаҵо.
Песков иажәақәа рыла америкатәи аӷбақәа урыстәылатәи аҳәаа рзааигәахара азхьаԥшра аҭахуп, аха макьаназы атәылақәа рхадацәа русбарҭақәа рыбжьара аинырра ыҟам.
Амшын еиқәаҿы иҟоу аҭагылазаашьазы ргәаанагара рҳәеит Урыстәыла ААР аҿгьы.
"Иҟарҵозеи Амшын еиқәаҿы америкатәи аӷбақәа? Ртәыла зықь кьылометра иацәыхараны. Акгьы узахҳәаауам. Ари иаанаго амца алахәмарроуп. Ари ҳара ҳгәаҭароуп иззырхоу", - иҳәоит Урыстәыла ААР аминистр ихаҭыԥуаҩ Сергеи Риабков.
Иара иажәақәа рыла Москва аҭагылазаашьа еилнакаауеит, аҭак аҟаҵарагьы иазыхиоуп.
НАТО аԥшыхәратә авиациа аҵыхәтәантәи аамҭазы Урыстәыла аҳәаа рҽазааигәатәны Амшын еиқәа арегион аҿы иԥыруеит ҳәа аҳәамҭа ҟанаҵеит Атәылахьчара аминистрра.
Иазгәаҭоуп арра-мшынтә мчрақәа, аҳауатәи амшынтәи ԥшыхәра рхархәагақәа иара убасгьы астратегиатә авиациа активла рхы шымҩаԥырго.
Уахыки-ҽнаки рыла Урыстәыла аракетатә ар НАТО аԥшыхәратә ҳаирпланқәа ԥшьба мҩаныргеит.
Аԥшыхәратә ҳаирпланқәа U-2S, RC-135 апатрультә ҳаирпланқәа P-8А Poseidon рыԥырра мҩаԥыргон Урыстәыла аҳәаа ааигәара.
Уаанӡа Амшын еиқәахь иҭалеит ЕАА афбатәи афлот афлагман Mount Whitney, аесминец Porter арратә ҽазыҟаҵарақәа рзы. Атәылахьчара аминистрраҿы ирҳәоит арҭ аӷбақәа хылаԥшра шрырҭо.