АҞӘА, абҵара 17 - Sputnik. Москва нап аҵаҩуп Аԥсны атуризм аминистрреи Ростуризми рыбжьара атуризм аусхк аҟны аилибакаареи аусеицуреи рзы Амеморандум. Абри атәы аанацҳауеит аусбарҭа апресс-маҵзура.
Адокумент анапаҵаҩра аԥсны-урыстәылатәи аизыҟазаашьақәа рыҿиара иацхраауеит, наҟ-ааҟтәи атуристтә еимдара иазнарҳауеит, иарҭбаауеит атуристтә маршрутқәа.
Аԥснытәи аган ахьӡала Амеморандум инапы аҵеиҩит атуризм аминистр Ҭеимураз Хышба, урыстәылатәи аган ахьӡала – Ростуризм аиҳабы Зарина Догузова.
Аԥсни Урыстәылеи ртуристтә усбарҭақәа рхадацәа атуристцәа рыԥсшьаразы аҭагылазаашьа маншәалақәа раԥҵара азҵаара иалацәажәеит, аԥхынтәи асезон амҩаԥысшьа иазааҭгылеит.
Ростуризм аиҳабы Зарина Догузова инаҵшьны иазгәалҭеит урыстәылатәи атуристцәа аԥыжәара шарҭо даҽа тәылак аҵакыраҿы шәарҭарада, иҭынчны аԥсшьара.
Хышба Ростуризм аиҳабы илыдигалеит акруизтә ӷбақәа Аҟәа амшынтә баӷәаза раҭаара азҵаара дахәаԥшырц. Аминистр иҳәеит акруизтә туризм аҿиара Аԥсныҟа хыԥхьаӡара рацәала атуристцәа раара ишацхраауа, уи Аԥсны атуристтә лшарақәа шеизнарҳауа.