АҞӘА, абҵара 18– Sputnik. Аԥсны атуризм аминистр Ҭеимураз Хышбеи Урыстәыла Ауаажәларратә еиҿкаара "Атуристцәа урыстәылазегьтәи реидгыла" ахантәаҩы Дмитри Давыденкои Урыстәыла Ауаажәларратә палатаҿы реиԥылараан атуристтә индустриа аусхк аҿы аԥсуа-аурыс Ассоциациа аԥҵаразы Аиқәшаҳаҭра рнапы аҵарҩит. Абри атәы аанацҳауеит Аԥсны атуризм аминистрра апресс-маҵзура.
"Аиԥылараҿы ирылацәажәан атуризм аусхк аҿы ауаажәларратә еиҿкаарақәа реиҩызаратә еимадара арӷәӷәара азҵаарақәа, ахәыҷқәа рыԥсшьара аиҿкаара", - азгәарҭоит апресс-маҵзураҿы.
Дмитри Давыденко инаҵшьны иазгәеиҭеит , еиҿагыларак ада сынтәа Аԥсны атуристтә сезон хҭысда ишымҩаԥысыз, аԥсшьаҩцәа ԥырхага шырмоуз.
Аҳәынҭдума адепутат Артиом Прокофьев иҳәеит ауааԥсыра рыԥсшьара аиҿкаара Урыстәыла аиҳабыра аԥыжәара шарҭо.